ايش نخسر لما يكون عندنا خطة محكمة؟
هاذي التدوينة تذكير لنفسي بمناسبة ٢٠٢١ و فكرة الأهداف و الخطط المحكمة.
تراكمات من الأفكار و القرارات اللي كانت نتيجة لخطط محكمة اتخذتها بسنوات سابقة تأثر سلبيا على تقدمي كل سنة .
و قررت انه من اليوم راح اعيش بدون بلان زي ماتقول فيبي في فريندز :)
اخر العام الماضي ،قبل اسبوعين تقريبا حضرت جلسة تأمل و كانت نيتي اني اكون لطيفة على نفسي و ارفق بها .
لطالما قسيت على نفسي بفكرة اتباع الخطة و أي شيء خارج الخطة خطأ سواء كان جيد أو سيء يثير حنقي بالمعنى الحرفي لكلمة حنق ، و جاء اللي اكون اكثر رفقا بنفسي و لطفا و اكون ممتنة و مقدرة للأشياء اللي احظى فيها و النعم اللي ربي غمرني فيها .
لكن اخاف تجي اخر السنة و أكون ماانجزت شي و ايضا ازعل من نفسي فقررت اكون اكثر حكمة و اعطي الحياة حقها من الجد و الهزل . و اخطط لأشياء بسيطة و صغيرة ترضي ضمير الخطط اللي داخلي و بنفس الوقت مااتوهق و اتورط اخر السنة لما القاني ماخسرت ١٠ كجم مثلا:)
ثلاثة أشياء تحكم على الخطط بالفشل :
١/المثالية و المبالغة في التخطيط
لازم يكون عندك تقبل لسير الخطة و عرقلتها بحسب الظروف .
و تكون أهداف مرنة بفترة مرنة،
فكرة الإستمرار على بند في خطة قديمة امنت فيها في وقت معين ، و ان اختلافي الحين عنها يأثر على نظرتي لنفسي يعطيني احساس إما بالفشل أو بقلة الحيلة و ازعل من نفسي و ممكن اقسى على نفسي اكثر و يصير عندي شعور بعدم الإنجاز و الاستنقاص و ادخل بحالة حزن و اكتئاب .
مثلا جلست سنوات امتنعت فيها عن اكمال دراستي الجامعية لإن ابى تخصص معين و للحين مادري لو كنت أصلا احب هذا التخصص ..أشياء كثيرة على هذا النحو و اشعرتني اني احاصر نفسي بنفسي و اعيق تقدمي بنفسي.
٢/الأهداف الغير مبنية على واقع ،
اعرف ان خطابات الأحلام و اتباع الشغف مؤثرة لكن ممكن تكون مهلكة لو كانت مبنية على وهم .
كيف ممكن وحدة تتبع حلمها انها تكون طبيبة مثلا و هي عمرها اربعين سنة، اول عائق القبول في الجامعات يشترط عمر معين و يشترط فترة زمنية معينة للشهادة و لنفترض جدلا انها تمكنت من دخول كلية الطب ، ماراح يمديها تواكب الخبرة اللي موجودة عند اقرانها و أسباب كثيرة تحكم على الموضوع بالفشل .
٣/ الطريق المظلم و عدم تحديد الوجهه ،كيف راح تحكم على نجاحك بهدف أو خطة مبهمة تماما ، إذا ماكان الإتجاه واضح يصعب السير طبعا.
و أخيرا اسمحوا لي أشارككم خطتي الغير محكمة لعشرين واحد وعشرين :
اقرأ اكثر
اكتب اكثر
اقضي وقت لطيف مع بناتي
ادرس طبعا
و اسوي رياضة احبها كل يوم
احافظ على صلاة الوتر
و ارتاح اكثر
انتبه لنفسيتي و لمزاجي
اسوي تجارب جديدة و استمتع .
تعليقات
إرسال تعليق